سكابا.. محكيّة غنائيّة..
سكابا يا دموع العين سكابا
غلا الأسعار تاعب هالأعصابا
نْ بقينا كم يوم عَ هالحالي
رح نشحد يمكن ونبيع التيابا.
نزلت السوق جيب أكل لَ ولادي
شفت الأسعار حرقتلي فؤادي
صفنت كتير ورفعت الأيادي
يارب الكون ارحم هالحبابا.
بزمن الحرب كتروا الحراميه/ي
سرقوا البلاد وباعوا هالقضية/ي
بدعي لربي والدمع بعينيي
يجازي الظلّام ويتقّل الحسابا.
سمعنا الأخبار وقرينا الجريدة/ي
فيها الأسعار بكل يوم جديدة/ي
تجار الدم خلونا عَ الحديدة/ي
مافينا نحكي ولا نرد الجوابا.
الأمل مفقود يا خوفي من بكرا
تموت القلوب وتتوضح الفكرا
شو مَ يصير وشو هي هالعبرا
تجويع الناس وتوسيع الخرابا.
شو كانت حلوه بزمانا عيشتنا
مستورة الحاله وهنيّه لقمتنا
شياطين الأرض طمعت بِ سلتنا
أخدوا العنبات وحرمونا الشرابا.
سكابا يادموع العين سكابا
غلا الأسعار حارق هالأعصابا
نْ بقينا كم يوم عَ هالحالة
رح نشحد يمكن ونبيع التيابا.
.. محمد عزو حرفوش..
ليست هناك تعليقات:
إرسال تعليق