.. محكيّة..
.. براءة حلم..
بعدك صغيره/ي
شو حلمك طري.
غاب القمر
كيف بدك تسهري.
شوفي السما
شو معبّقة أسرار
لا طيور ملوّنة
لا عطر لا أزهار
غير الحلم الطري
ما فيكِ تغمري.
تراب الأرض
مشقشق وعطشان
مقهور ع كلّ
البشر عتبان
حتّى المطر
غافل ونسيان
لا تستعجلي
يا صغيره/ي
إنّك تكبري.
ضلّي بريئة
مفتحةْ
متل الورود
متل حنان الأم
ما بيعرف حدود
متل غصن زيتون
متل شي عنقود
ناطر أيلول
تَ يدوب وتعصري.
ماضل فراشات
لا تزعلي
وعن ظلم الكبار
لا تسألي
اضحكي والعبي
لا تدبلي
بيعي عقارب الوقت
أو كسّري.
نامي وغطّي
حلمك بالرموش
خبيه تا ما تسرقو
الوحوش
ادعي ل الله
من فوق العروش
تضلك سعيده/ي
وما تتعتّري.
.. محمد عزو حرفوش..
ليست هناك تعليقات:
إرسال تعليق