لحظة تمني
٠٠٠٠٠٠٠٠٠٠
طلعت الشمس وغاب القمر
والدني اسودّت وجارت علينا
ما بقي من العمر إلا الصبر
والله تعبنا وما بقى فينا
منّك ورثنا الشقا وكل القهر
لنعيش بنعيمك ياما تمنّينا
يمكن هيك مكتوب القدر
بالهمّ مجبولة ايامنا وليالينا
من يوم ما خلقنا حروب وضجر
وأفكار سودا أخذت منّا أمانينا
دعينا لرب العرش بوقت السَحَر
تهجّدنا بالصّلا سبّحنا وصلينا
وأدينا مكللة بالخير إلا ما نَـدَر
عيب الحكي والله بيشهد علينا
يا دني بيكفي سموم وغدر
نحنا فيك ضيوف لازم تكرمينا
وين جموعنا وأيام السهـر
نحاكي القمر والقمر يحكينا
وجناين ورد وصوت الشجر
متل موّال يأنسنا ويأنس روابينا
غرووب وموقدة ونار وجمر
وبريق شاي مخمّر بالكرم يسقينا
والعود يعزف..ويجود الوتر
ول أوف تطلع صدى وتشجينا
وصبايا ترقص بشالها الأحمر
تغنّي عتابا وبشفافها بترويـنـا
وبهزّ الخصر قلبي ذاب وتمرمر
يا حلوة إذا قلبك إليّ مال ارضينا
بغمّرة يا سمرة عخدك الأسمر
لترجع أيامنا ومنها نحييّ ليالينا
(حسين جمعة)لبنان
ليست هناك تعليقات:
إرسال تعليق