غربتنا صعبة
٠٠٠٠٠٠٠٠٠٠٠
نحجرنا وصرنا نرتل الآيات
وتغيرت بالحجر دنيتنا
ونعدّ أرقام عن الحالات
والبعد فرّقنا وتفرقت جيرتنا
وحنّ القلب للمرج للزهرات
للعين لشوار ضيعتنا
للكرز للوز والخوخات
ونقطف من كواز تـيـنـتـنـا
شتقنا لصياح الديك والنسمات
للمصطبي والحوض لزرار فلّــتنا
ومحّمص القهوة من ديات
أمي بيحلى فنجان قهوتـنـا
وزقزقة العصافير بالذات
حساسين العشعشوا بسنديانتنا
ونجوم السما شامات
شعشعوا دارنا ونوّروا سـهـرتـنـا
والفجر عنّا إلو نغمات
بتسمع مواويل بزواريب حـارتـنـا
وترويقة الصاج إلى حكايات
أصناف مشكّلة من إيد جـارتـنـا
تفضل يا أبني ذوق هلّ الخبزات
خرج تمك كول تتحلى فيك جمعـتنـا
تذكّر وأديش حلوة الذكريات
أربع مواسم وكل موسم بيحكي حكايتنا
وسهلنا كلّوا جنى وخيرات
خضّر المساكب بألوان حقلـتـنـا
وبجنبنا عرزال متل لوحات
رسّام من ريشتوا بالوحي رسمـتنـا
ونبع المي زيّن الحورات
والليل غفي قبلـنـا بفرّشتـنـا
والصبح غنّى مع النايات
بمنجيرة الراعي ع لحن جوقـتـنـا
وصبايا ع كتافها شالات
وفساتين للدبكة بجمالها سحرتنا
ونقعد جنب الشوك بالخلوات
ويطول الغزل ع طول قـعـدتـنـا
آخ يا هل العمر شو فات
منك سنين وسرق منّا فرحـتـنـا
ما بقي إلا ورق للأبيات
وقلم نكتب ونعدّ سنين غربتنـا
يا مين يرجّع لِّ فات
ونرجع سوى ع دراج ضيعتـنـا
(حسين جمعة)لبنان
ليست هناك تعليقات:
إرسال تعليق