بيوم من الايام كان عندي قلب
كان عندي روح
كتت بضحك
كنت بشوف الحياة حلوة
والكون بيبتسم
كنت ارسم وسط السما قلوب صافية
كان القمر مش تعبان
كانت النجوم مش دبلانة
كانت العصافير تملي الدنيي غناني
يمكن كانت تحتفل فرحاانة
كنت حاكي الورد و بعيوني اغمزله
ومن قلبي بفرح اهمسله
يضحك البنفسج ويتلوى الجوري بأحضاني
وتهتز عريشتنا وتورق اغصانها العريانة
كنت متل طفلة صغيرة
ع دروب ضيعتنا الهث هون وهون
اقطف كبوش التوت عن حفافي السواقي
وغني عتابا وميجانا
ولم زهور ملونة
حطهم تاج .واركض فرحانة
وشعري الاشقر عكتافي يطير
يلوح للشمس
ليش زعلانة
وعيون ع الدرب تشوفني وتجن
ترقص ع نغمة خلخالي
واسوارة مزركشة بدل هالكم
وطوق ياسمين يزهر ع صدري حب
واماني
كنت من كل بستان عطر شم
وبكل شمة انسى احزاني
كنت وكانوا الناس ببعض فرحانين
شو تغير
يا دنيي عم نام زعلاني
يا ترى تغير الليل
وانطفت الشمس
ورحلت مع هالغيم
الاسامي
سلوى دندش
نهار الأحد/٢٢/١١/٢٠٢٠
ليست هناك تعليقات:
إرسال تعليق