.. محكيّة ..
.. صرخة نبض..
كان الحلم بعدو طري
ونهدات الروح غفياني.
ع غنيّه هامات تنحني
بلاد العرب أوطاني.
صار ختيار من كم سني
مكسور وعكّاز خرباني.
حتّى هاك السوسني
يبستْ بضلوع عطشاني.
كنّا صغار والعمر هني
وعيون بالرضا شبعاني.
آه شو تغيّرت هالدني
تصحّرت قلوب ريّاني.
أجيال بالجَهل مفرعني
ووجوه صفره سكراني.
الضماير صارت معفّني
بالحقد والشرّ ربياني.
ناس عَ وجع ناس تغتني
وناس بالوجع غرقاني.
ما عدت أعرف شو بِني
ضايع مقلوب ميزاني.
الوطن يا ربّي الغني
رجّعوا مابدنا وطن تاني.
.. محمد عزو حرفوش..
ليست هناك تعليقات:
إرسال تعليق