محكية غنائية..
ست الحلوات..
تسلملي ست الحلوات
يلّي بتتغاوى بحالا
بغار عليا من النسمات
لو مرّتْ جنب خيالا.
يا تسلملي لمّا تطل
عَ خدا ياسمين وفل
قمر مضوي بس تهل
بيخجل يستنّى قبالا.
شعرا أغزر من شلال
أسود من ليل الأدغال
ألف قصيدة وموّال
مَ بتكفي توصف شالا.
حور عيونا ماشالله
بِ نظرة القلوب تشلّا
واللي بيقدر يوصلّا
بيغفى عَ سفح تلالا.
سال الشهد من شفافا
سحرتني بِ أوصافا
القمر أول مَ شافا
صار يغنّي عَ اللا لا.
خصرا مزيّن تيابا
بدو أوف وعتابا
متل قوس الربابا
عَ يمينا وشمالا.
لالا يا عمي لالا
تكرج كرج الغزالا
غاروا منها هالنجمات
وحسدوها عَ جمالا.
.. محمد عزو حرفوش..
ليست هناك تعليقات:
إرسال تعليق