** { طوفان بلا سفينة } **
جايي من صوبا وهج بيحرق كالنار
صوتو من بعيد بيهدر كنّو إعصار
شِفت العالم هرباني منّو يا حَيف
قلتلُّن عيب عليكُن جايينا ضَيف
قالو يا عمّمي أصعب من حرّ الصّيف
قلتلُّن انتو من وين جبتو الأخبار
،،،،،،،،،،،،،،،،،،،
هيدي الحلوي المزيونا بَعتِت مرسال
عَم تشرح عن أحوالا شي عال العال
بتعرِف هالحال العِنّا مُضحك مُبكي
من قلّة وفر الزرع الكل بيشكي
خَيّو ما ضلّ علينا نتفة سلكي
نستر هالجسم العاري . عَزا وشحَّار
،،،،،،،،،،،،،،،،،،
متل الطير العَم يرقص من جرح كبير
هيدي القصّه مفهومي من دون تفكير
وينَك يا زْمان الكنّا نمشي أحرار
انسافر ما نخشى عتمة ليل ولا نهار
والطَّبخا احترقِت لمّا صارو التّجار
يرشّو ع الأكل السّم برفع الأسعار
،،،،،،،،،،،،،،،،،،،،،
لعنكم الواحد القَهّار ومولاكم الدولار
عادل سعيد / سوريا
ليست هناك تعليقات:
إرسال تعليق