محاوره زجليه ، موضوع ملح وسكر
علي…
دور التحدي صار هلق يا أبو
فايز تحدى ،وخييلك العالي ركبو
معتاد إني طالبي مارسبو
تا شجعو حتى يصير ودرّبو
ومن قبل ما كاس المعاني شربو
بحاول على محك القوافي جربو
تانقنع الناس الّلي فينا رحبو.
وجمهورنا تا نمتعوا وتا نطربو
بين الملح والسكر الشوط بتدى
ال بتفضلو بكاس البلاغة دوبو
رح عيدها ، وقطر المعاني اسكبو
وبحر الشعر والفن سيير مركبو
حتى قلام الذوق عنا يكتبو
وكل شاعر يغطي مساحة ملعبو
عبدالله..
دور التحدي صار، مين ال خوّلك
تحكي بإسم كبار في ليل الحلك
بتنجح وترسب ما أجهلك
لشاعر طريقو ع النجم قبلك سلك
يخزي العين صاير مدرب ياملك
كذبه عليها الناس بدها تسألك
بين الملح والسكر شو دخلك
ع بحر امواجو الكل فيها هّلك
بسُكر قوافي الفن رح حلي القريض
وخلي اجاج الملح ياسيدي الك
رح عيدها ورح زيدها تا مولك
وع منبري متل الطفل رح دللك
ماأجملك ماأروعك ما أسهلك
وقربان للشعر وشموخو حللك
علي…
تركلي الملح كلمه معانيها كبار
منها تعلمنا المحبة والوقار
لولا الملح ماكان دايب بالبحار
كان بالعالم جماعي الإنتحار
والجوهرة ال من اتقل وأغلى عيار
لولا الملوحة ماحتفظ فيها المحار
يعني الملح آية ببحر مالو قرار
حافظ عليك وع الخليقة من الدمار
ولوما انتشر بتلات ارباع الدني
ماكان صفى لا كبار ولا صغار
رح عيدها تا فهمك بالإختصار
عن معجزه وحطا بعين الاعتبار
تتصير عن فهم وزكا تنقي الخيار
ولا يكون حظك متل لعييب القمار
عبدالله...
تركتلك الملح وانا السكر الي
ورح شتريلك مملحه من مَشكله
ملح البحر آية كبيرة منزله
تا يحفظ الجسم المتل جسمك بلي
وبالسكر الدايب اذا كاسي حلي
بْحليّ بحور الشعر اول مرحلي
الدرة ال ببحر الملوحة مشلشله
بيستخرجوها بصنعو منها الحلي
لو بالملح بتضلها الفين عام
بتضيع متلك بالملوحة ياعلي
رح عيدها خلي المسامع تنجلي
بكلمات بسُكر ع حلا حروفها الحُلي
كل قافيه متل العروس مكلله
بسكر معاني الفن عين مكحله
علي…
سقراط ماشالله شو عم يطلع معو
عالم النفس عا لشعر طَعم مطلعو
السكر غذاء الروح شو اللي بيمنعو
ياريتنا قولو بفعله بنقشعو
لكن اذا رجعنا لأصلو ومنبعو
تانقنعو بالسكر الواقف معو
تآمل اذا الإنسان ظرفو بيخدعو
وقلبو على لحظة قرار بيوجعو
شو الي بإنسانيته بيتشفعو
الدموع يلي سكبها مدمعو
السكر بحالات الآسى مابينفعو
ويمكن اذا تجنى عليه بيصرعو
بيبقى لو نزل بيصبح قطعة جليد
ولولا بيطلع روحك بتطلع معو
رح عيدها وخلي الخليقه يسمعو
وعلي فوق المجرة ارفعو
من قبلك كتار بها المهنه ادعو
وكل واحد اتطاول جمعتو بمصرعو
عبدالله…
يخزي العين شو هالطبيب الألمعي
الجايي عن الأمراض خبرة يدعي
حطيت ع جرحك ملح خاب السعي
الجرح لتهب والنفس عم تلعي لعي
شو عترك تا وقعت هالوقعه معي
صارت عيوني عليك تزرف ادمعي
المتلك ع مشفى ابن سينا بناخدو
وندعي ل الله هونيك يرجعلو الوعي
رح عيدها وخلي الحلا من مطلعي
وخلي العسل يقطر شهد من منبعي
علي…
صعبة عليي واجهو بكلمة جفا
للفتكر اللمبة بنفخة بتنطفا
العادات والتقليد مش كلمة وكفا
ولا سُكرة العيد بمعنيها كتفا
والطفل يلي أولو مشيي الحفا
سلاحو حجر مافكر بساعة صفا
وأم الشهيد ال بعد قلبها ماشتفا
وال إبنها عن ارض اجدادو انفا
واللي ع خط النار جفنو ماغفا
باع الدني وماعاد ع بيتو لفا
هودي علينا دينهم مابينوفى
وإلهم تا نوفي عهودنا بآي صفا
هو كلهم بالسكره مابيقبلو
ال مالو ملح لا دين عندو ولا وفى
رح عيدها وما بحب احكي بالقفا
تا يضل جو حبابنا إلفه وصفا
وعبد. اذا بزيدها اعتبرو اختفا
برده زجل رح زوره ديار الهفا
عبدالله…
يخزي العين ع هل حكمه اختارها
النفخة ال بتطفي النور شو اسرارها
هي حكمة مجانين مشفى زارها
عقل الطفل مابحملو اوزارها
الطفل الفرح بالسكرة واختارها
مش متل غصة حترق قلبو بنارها
وروح الشهيد الخالدة بايثارها
مش بالملح بيطفوا اعصارها
بروحو فدا بلادو وبذل دمو الشهيد
تا يعيش في جنة عسل انهارها
رح عيدها ورح سمعك اخبارها
تعلم ياابو فايز عزف اوتارها
الردة اللي مابيبقى تقيل عيارها
لا تقولها بتصغر بعين كبارها
علي...
اسم الله على عبد رفع صوتو وبدي
يجيب القوافي ملزمة ومعقدي
للملح شو خليت ياطبع الردي
اللي بينكر المعروف صعبه يهتدي
أيا توب بدك قبالي ترتدي
لابتنشها ولا موردك من موردي
شو بدنا بقصبة بحلاها معربدي
دور معي يامعجب ببرج الجدي
ع لقمة العيش ال بكلمة مهددي
عا نار مابقي الجمر بالموقدي
رغيفك اذا بخففو ملحو شوي بتسب ع اللي صََنَعو المرقدي
رح عيدها كرمال وجنه موردي
للحب بتصلي ع قِبلة معبدي
ياشعر با الهام ياحَب النِدي
يالين يارقه يافكره مشردي
عبدالله....
الله يعينك ياابن عبد النبي
ع عقلك اللي بعتم افكارك ربي
ملح الرغيف آللي اعتبرتو موهبه
مابيرفعك بين المنابر مرتبه
يامزخر دماغك بطلقة خلبي
رغيف الخبز ماعاد حلمي ومطلبي
وجايي عليه اليوم تعمل مَندبه
التربه بتهري ملوحتها ياحبيب
شروش القمح تاتصير بور المسكبه
ومتلك فقيرة وقاحله بتبقى البلاد
بتستورد طحينها من الأجنبي
رح عيدها ورجع زمان المكتبة
تا تقرأ وتحفظ معاني محببه
علي.. قصيده
بريشة خاطري ودمعه عيوني
اكتبي اسمي على النسمه الحنونه
واذا جن الليل والصمت خيم
تركي جنون الهوى يقابل جنوني
انا البحر ال حدى بموسى وحطم
قوم فرعون لما عاكسوني
انا الموج ال فوق تنور عرم
حمل نوح النبي وألقى الرعونة
انا دمعه طفل بالمهد آبغم
بقلب امو زرع عطف وليونه
انا ل جروح آهل الجود بلسم
انا جهنم على اللي بيجحدوني
انا للشر لو بيكون طلسم
بفك الطلسم بعقدة جفوني
انا الجرح ال بالأمه تكلم
لو ما يكون بعيون الأعادي
ملح كانو الأعادي دوبوني
عبدالله.. قرادي
بحب الفن وأهل الفن
تغنى القلب ودقاته
كل ماالليل عليي جن
بشعري برقص نجماته
ع المنبر وقفنا تنين
للمنبر عنا اسرار
تا علم علي من وين
منقطف نور من الأقمار
ياخسارة تاري المسكين
ال رداتو مراشقة حجار
الطفل ال ماعمر يومين
بيخجل يسمع رداتو
علي...
رداتك خرج الترفيه
اللي بحبو يتسلو
والمتلك عقله بيكفيه
بين العالم يادلو
حزرتو بأول تنبيه
وال مابيسمع شو بقلو
رح قلو الله يشفيه
ويردلو عقلاته
عبدالله...
ظلمت الدمعه ياحباب
ولو تعرف فضل الدمعه
دمعه قلب الأم الداب
حنيه متل الشمعه
الدمعه صوفيه بكتاب
فيها الحكمه مجتمعه
ودمعه أم ال إبنها غاب
وبعدا بتنطر طلاته
علي.. .
مهوس وبتفركش فيك
يعني انك مابتنشاف
عبدالله الله يهديك
الصوفيه حب وانصاف
لا يبقى جهلك عاميك
شاطر بس تهز كتاف
اللي بيّطلع مره فيك
بيستخسر تطليعاته
.....،،،،،،،........،،،،،،........
ليست هناك تعليقات:
إرسال تعليق